尋日參加咗大學嘅畢業禮（美加嘅大學通常喺8月中開課，所以5月中至5月尾係春季畢業禮嘅季節），聽咗幾篇好發人深省嘅演講，聽完之後，我想同應屆畢業的香港年青人分享一下，大家一齊諗吓香港該走嘅路。
我參加嘅春季畢業禮有291人畢業，可能您會話：少唔少啲呀！喺呀，成個關島得大約16萬人（可能同天水圍一個屋村嘅人口差不多），291人已經唔算少。所以每季嘅大學畢業禮，都係關島嘅大事。所以本地兩份主要報章（無錯，每日出版嘅大報只有兩份）：Pacific Daily News 同 Marianas Variety 都有報道。
昨日，大學校長 Dr. Underwood 演講時，他勉勵學生要「喺追求個人理想時，亦要知道自己對其他人嘅責任：因為不負責任咁去追求理想，就會好似一個漏氣嘅氣球，一開始時會好有力量，不過最後會喺無法預計嘅路途上，因為洩氣而倒地。」
Dr. Robert Underwood: "We must find our individual passion while we recognize our responsibility to others. Passion without responsibility is like the air going out of a balloon ... it seems powerful until it is spent and the balloon just lays on the floor after a burst of energy and an unpredictable voyage."
作為21世紀在香港嘅年青人，到底你有乜野個人理想，同埋對其他人有乜野的責任呢？到底政改，反對（中共式的）愛國教育，參加佔中，以至支持本土喺我哋嘅人生中應該放係乜野位置，係大家要仔細去諗嘅問題。
以上問題嘅答案，有部份已經由另一位嘉賓，Palau 總統 Tommy Remengesau Jr. 解答咗。Remengesau 對畢業生話：「我挑戰您：畢業之後唔好只係做一個夥計，要做策劃者，要搞生意，要做有貢獻嘅參與者，要成為問題嘅解決方案，要做領袖，要以島國精神為動力去打拼，因為現今世界就係要呢啲嘢。……只有互相專重同埋互相體諒嘅信念先係令到我哋本土興旺，亦會令所有人得益。呢個信念係會令世界更美好！」
Palau President Tommy Remengesau Jr.: "I am challenging you: Don't just go out there and be a member of the workforce – be an initiator, start a business, be a meaningful contributor, be a part of the solution, be a leader. Do it with our island values with you because the world needs that. .... They are a belief that respect and consideration makes our community stronger and increases the overall well-being of everyone. These beliefs can make the world a better place too."
某程度上，如果將香港當成一個獨立個體，香港會同一個島國相似。 好多島國，例如Palau，又或者將會再作獨立公投嘅關島，都係由前殖民地／托管地轉為政府實體。當然，您會問：關島只有16萬人口，Palau只有2萬 人，可以做啲乜。我就話您聽：人地可以公投決定是否（或者已經）獨立成國；Palau總統Remengesau Jr.更在聯合國發言，提出因為環保及保護Palau可持續發展，禁止在Palau領海做商業捕魚（http://www.unmultimedia.org/tv/unifeed/2014/02/un-palau-oceans/），有關提議係獲得國際認同。
回應返上文，到底我哋有乜野個人理想，同埋對其他人有乜野的責任呢？坦白講，每個人嘅個人理想會唔同，不過對其他人嘅責任就比較簡單去理解。我哋嘅上一代有好多人係戰後一代，有啲係逃難（二戰，中國內戰，東南亞赤化戰爭等等）到香港，一直有一種「旅居」香港嘅心態，即使住喺香港，甚至死喺香港，都唔覺得香港係自己地方，所以一直唔會為下一代香港人（包括自己後代）去著想，只會以 short-term profit maximization 嘅方向去發展香港。情況同中國內戰時逃難去台灣嘅外省人（大部份係國民黨人）一樣，佢哋發展台灣嘅原因係因為生活，而唔係為台灣，所以一見到商機，就可以支持賣台嘅服貿協議。所以，當香港宜家要面對政改，面對洗腦式嘅中共愛國教育，以及面對一切中共殖民式侵入香港時，上一代「旅居」香港嘅香港人會選擇唔做反應，甚至會對企圖保護香港核心價值嘅本土運動作出反對：因為有關行動會影響佢哋嘅 short-term Profit Maximization!
如果你係一位21世紀嘅香港年青人，你問我你對其他人有乜野的責任呢？我會答你：如果你認同自己係香港人，你就應該為自己一代以及下一代香港人付出，不再只追求私利。我哋嘅責任係為自己及下一代建立一個能令大家引以為傲嘅香港。所以，我哋要積極支持要有無篩選嘅普選，以避免立法機關以及特首淪為只為權貴以及中共服務的傀儡（就好似現屆由國民黨控制嘅台灣立法院一樣，只為國民黨的大一統賣台政治方向服務）；我哋要支持本土運動去保護香港核心價值，去抗衡中共殖民式侵入香港；以及我哋要為我哋嘅社會去重新建立一套有長遠方針，可持續發展嘅方向，令香港本土文化及價值，可以落地生根。正如 Remengesau Jr. 所講：「只有互相專重同埋互相體諒嘅信念先係令到我哋本土興旺，亦會令所有人得益。呢個信念係會令世界更美好！」
希望每一位認同自己係真正香港人嘅你，會認真思考，去帶領香港，去行一條令香港會令世界更美好嘅道路！
（標題為編輯另擬）
（圖片來源：larique via Flickr）