啱啱拜讀完車厘哥小姐嘅鴻文《與自己政見不合的男人》，十分感慨。固然，對住道不同不相為謀嘅異性，係真係 nothing good say 嘅，莫講話要做人世。但係小妹覺得，我哋呢類人喺生活中通常要面對嘅，多數唔係車小姐講嘅嗰款，而係下面呢一款。

試諗諗，我哋每日嘅工餘時間，都喺度追趕一篇又一篇嘅出爐新聞同時事評論，有時仲要親身去參與遊行集會同公眾論壇、寄信或者電郵回應政策諮詢，更加唔使講自己都忍唔住投一兩篇文稿或漫畫創作抒發己見，時間非常之唔見使。而你嘅伴侶或者朋友（不論男女），就只會同你講呢啲：

「Level’s 啱啱出咗秋冬型錄，嗰條870牛超～級靚囉！我諗有錢都未必搶到！咪嘞，都係而家請定發售日嗰日假，去 Level’s 通宵排隊先。」

「銅鑼灣開咗間新嘅拉麵舖呀！阿 Judy 上個禮拜去排咗4個鐘先食到，佢話好好味，同日本嘅一模一樣呀！不如我哋星期六朝早8點去排吖？咁早去應該唔使4個鐘啩？」

「同事 Kelvin 去完日本返嚟，俾啲餵鹿仔嘅相我哋睇，真係好得意㗎。佢勁好人囉，仲買咗好多軟力果嘅零食俾我哋 team，有隻85周年嘅百力滋，香港無得買㗎，勁好食囉！一下就俾同事搶晒啦！……你睇緊咩啫？」

「廣東道驅蝗事件。」

「廣東道發生咩事？喂，喂～」

「係係係。」

「我頭先講咗啲咩？」

「百力滋好好食吖嘛。」

「邊個同事買㗎？」

「……」

「你都無專心聽我講嘢嘅！淨係掛住掃電話！」

「但係廣東道驅蝗事件迴響好大喎，黎棟國、蘇錦樑同譚志源3個高官都走咗出嚟回應呀。」

「啲高官成日都喺度講嘢㗎啦，有咩好睇喎。係嘞，我個袋靚唔靚呀？上次同中學同學去首爾嗰陣買㗎，你應該未見過。係咪好特別呢？我覺得有少少難 carry，但係勝在唔易同人撞款。你話係唔係呢？」

「……嗯，幾好睇吖。」

最慘嘅係，有一日，佢會向你訴苦：「平時去開嗰間文具舖都執咗笠！我企咗喺度，一時間都唔知去邊度買文具好！」你回應：「唔奇吖，因為嗰度就快重建做『囍歡里』吖嘛！」佢一頭霧水咁反問：「你講咩嘢『囍歡里』？」你肯肯定想一頭撼埋牆。

你覺得呢種人好 un頂able，佢唔係支持乜嘢你唔喜歡嘅政黨，或者佢 buy 普教中你 buy 香港獨立，而係佢對呢啲嘢根本零關注零認識零思考。有時小妹都唔明白，我哋明明住喺同一片彈丸之地上面，面對同樣嘅民生問題，自己關心嘅種種明明都好切身好貼地，但係總覺得身邊多數人都係抱住 WFC 嘅態度，而自己成為咗 minorities。

喺日常生活中，我哋無可避免地感到孤獨，覺得自己微弱嘅絮語無人能懂；所幸我哋仲可以喺網上搵到同伴。至於喺呢一小堆 minorities 入面搵唔搵到伴侶咯喎，咁就真係要睇緣份嘞。