我曾經以為係 work 到，車，我同你一齊都係生活上嘅嘢，最多年中幾次遊行我自己搵伴去囉。後來發現，件事無你諗得咁簡單。首先睇下你政見不合係咩嘢，比如話你係福利主義佢唔係，你要佔中佢覺得要循序漸進，呢啲算係小事，可能 ok，睇番佢背後個 rationale。但如果去到佢支持共產黨、支持六四、覺得大公司壟斷係好，仆你個街，原來真係好大鑊。即使你唔同佢討論政事，但一個人思考完會得出咁嘅結論，邏輯思維、推理能力、rationale、甚至個腦，一定係有事，所以相處落去你會發現，佢各式決定和反應都會出現問題，因為佢個腦根本有啲事（無惡意）。

一個讀飽書嘅後生仔，喺無利益前題下咁相信，真係好驚，原來世界真係有啲咁嘅人。佢竟然會話：「今日中國咁強大都係因為共產黨，今日中國咁多人生活咁好係因為共產黨，我哋要感恩，無共產黨中國仲有好多人捱餓。」我已經倒吸一口冷氣。「我真係好想返大陸做嘢，因為依家大陸係好強大，我好想認識多啲。」 當我解釋大陸的貪污、污染、無合約精神、文化問題，佢好似無聽見，繼續重覆，然後加多句：「你唔可以要求咁多，佢會慢慢好。」「你係點 predict 到會有呢個 trend 呢?」解釋唔到，總之咁覺得，佢所有推論，都無哂中間嘅嘢，純粹有問題，然後結論。

好，咁我同佢講中國近幾十年來的事，無一件佢知，原來佢根本唔睇時事，你每講一件佢都當係個別事件，咁到底係乜嘢支撐到佢咁強大嘅信念呢？唔知，佢自己都答唔到。可能係中國嘅 GDP 啩，可能啲雜誌話中國好勁啩。咁六四你知啦啩？佢話，因為六四咁嘅屠城行動，中國之後先有咁好經濟發展？死少少人，利益多多人。咦？點推論出黎？無，聽佢講完，純粹因為時間性上發生咗六四，後來經濟好，所以覺得兩件事有必然關係。咁得意？！會唔會唔發生六四，經濟更好，超英趕美呢？唔知架，無發生過無人知喎，但起碼發生咗，依家係好呀。

又譬如話，佢話覺得電力公司係良心企業，簡直係社會公益，我好震驚，點解你咁覺得呢？「因為一個地方如果無電力公司，我哋就無電用，佢哋為我地做咗 好多嘢。」「下？？？我有畀錢架喎！唔係 Free 架喎！！」我有些少激動，但我抑壓住。「你肯畀錢都未必有人做架，你依家比錢我，我都做唔到個電廠出嚟呀。」

我真係唔想再講落去。我深深吸一口氣，抑壓住自己發飆的衝動，我非常極之不願意傷害任何男人的尊嚴，我要再說一句，那一句必然不是什麼好聽的話。我微笑（你想像唔到，我可以有幾高EQ）。

無論你點同佢傾，佢都聽唔明，只是用一副高高在上、看透世事、充滿智慧的口面對住你，然後話：「anyway（輕輕眨眼，聳膊頭），我係咁覺得。」我幾乎想爆炸，但用微笑壓制住殺氣。

一個人，有一個立場，是因為他思考過，有資料，然後分析歸納，推論，再總結。如果個總結可以咁荒謬，或者個推論是如此無跡可尋，又或者完全没有資料在純「想當然矣」的情況下，下一個咁確然嘅結論，佢做其他決定時亦將會一樣（譬如佢根據中國好呢個結論，下一步就會想去中國工作，卻完全没有發覺上個結論其實如此荒謬），兩個人相處，有好多商討、好多決定，或大或小，這樣的人，必不長久，除非除了政見，你能一生一世忍受其他如此無理由無厘頭無章法的推論而作出的決定、見解、意見，乃至於對你的批評，而且一直忍住面口，微笑，吞咗佢。忍一時可以，長期我知我唔得，所以算數。

以上的政見不合，其實是人蠢，唔識思考。蠢男人又何止一個，有時我真係諗，做女人係咪真係要忍受人蠢，做得到，其實市場好大，亦可以輕易嫁得好好，我唔知，我諗唔通，問同屋，結果，兩條女好落寞咁，寂靜地坐係梳化，繼續食煙。

（本文原載於作者網誌，蒙作者答允轉載。作者面書專頁：https://www.facebook.com/chelaygor）

（圖片來源：freechen_1990@flickr）